Empresarionan ku ta interesá pa partisipá na e ‘Business Incubator’ di Entidat Públiko Boneiru por registrá aworaki pa esaki. Resientemente diputado Hennyson Thielman a revelá e plannan pa un ‘Business
Incubator’ na Boneiru. E meta di esaki ta pa stimulá empresanan chikí i empresarionan independiente i tambe pa stimulá inovashon i diversifikashon den e ekonomia di Boneiru. E ‘Business Incubator’ ta un ofisina kaminda empresarionan ku a kaba di start ku nan empresa por sinta huntu. E ta ofresé e empresario un luga mueblá ku internèt i di e manera aki ta spar riba gastu. Banda di esaki e ta e luga ideal pa siña di otro i inspirá otro.
Bou di guia empresarionan por desaroyá nan empresa eksitosamente. Konkretamente esaki ta enserá ku ta ofresé un programa di ‘coaching’, ‘training’, guia di empresa, ‘workshops’ i nètwèrk’. E nòmber ku a duna e ‘Business Incubator’ ta ‘BusinesSpark’. Esaki ta referí na e ‘spark’, pues e chispa ku mester stimulá e kualidat ku e empresario mester tin na Boneiru. E promé ‘BusinessSpark’ lo ta na Playa na Kaya Betico Croes 1. Pa partisipá na e ‘BusinesSpark’, e empresario mester tin por lo menos 18 aña i mester tin
mas ku 1 aña inskribí na Boneiru. E empresa ta establesé na Boneiru i ta inskribí na Kámara di Komersio i na ofisina di impuesto (Belastingdienst). E empresario a traha un plan di negoshi simpel. Den e plan aki e empresario ta splika kua servisio òf produkto e ta brinda i dikon.

E empresario ta splika tambe kua ta e posibilidatnan pa e produkto òf servisio riba merkado. Ta spera di e empresario ku e ta duna un presentashon di e plan di negoshi. Empresarionan ku ke partisipá na e ‘BusinessSpark’, por registrá nan mes te 29 di aprel próksimo riba adrès elektróniko: empresa@bonairegov.com. Na momentu di registrashon nan mester manda tambe e plan di negoshi, un kopia di e sedula, un kopia resien di inskripshon na Kámara di Komersio i e number di CRIB di e empresa.
Un tim di profeshonal lo evaluá e registrashonnan pa asina skohe e promé grupo di partisipantenan. Akinan e preferensia lo ta pa empresarionan (nobo) ku un aktividat inovativo ku ta kontribuí na sea inovashon, kreatividat, durabilidat òf diversifikashon di e ekonomia. Depende di e nesesidat, lo habri den futuro mas lokalidat di ‘BusinesSpark’ den otro barionan na Boneiru. Pa mas pregunta òf informashon interesadonan por manda un e-mail na empresa@bonairegov.com òf yama na number di telefòn 715 5372.

error

Enjoy this blog? Please spread the word :)

WordPress Cookie Plugin by Real Cookie Banner