Na 2022, mas ku 6 for di 10 mayor ku trabou ku yu bou di 12 aña na Hulanda Karibense por lo ménos tur siman a hasi uso di akohida di mucha ofishal. E muchanan a bai un akohida di mucha, skol di hunga òf akohida despues di skol. Un promedio di 91 porshento di mayor entre 15 i 75 aña ku yu bou di 12 aña tabatin trabou. Esei CBS ta mèldu a base di sifranan nobo for di e Arbeidskrachten Onderzoek (AKO; Investigashon Forsa Laboral) Hulanda Karibense.

Na 2022, na Hulanda Karibense tabatin mas ku 4 100 mayor ku yu bou di 12 aña bibá na kas; kasi 3.300 na Boneiru, mas ku 500 na Sint Eustatius i kasi 300 na Saba. Di e mayornan ku trabou ku yu chikitu, 63 porshento minimalmente un biaha pa siman a hasi uso di akohida di mucha ofishal, manera un akohida di mucha, skol di hunga òf akohida despues di skol. Na Sint Eustatius ku 79 porshento, esei tabata mas tantu, kompará ku 61 porshento na Boneiru i 51 porshento na Saba.

Kuarta parti di mayor na Saba ta hasi uso di akohida di familiar, amigu, bisiña òf boluntario
En bes di akohida ofishal, mayor tambe por skohe pa otro, òf vários forma di akohida di mucha. 14 porshento di mayor ku trabou ku yu bou di 12 aña a hasi uso di akohida di mucha no pagá dor di famia, amigu, bisiña òf un organisashon di boluntario. Ku 24 porshento, na Saba e tabata mas frekuente, na Sint Eustatius e tabata 17 porshento i na Boneiru 13 porshento. Tambe, na Saba (22 porshento) muchanan tabata haña akohida dor di un mayor mas frekuentemente ku na e otro islanan. Esaki ta posibel tantu paden komo pafó di e propio kas di famia (ora e mayornan no ta biba huntu). 8 porshento tabata hasi uso ménos ku un biaha pa siman òf nunka di akohida pa nan yunan. Na Boneiru esei tabata konta pa mas tantu mayor (9 porshento) ku na Saba (4 porshento) i Sint Eustatius (5 porshento).

9 for di 10 mayor na Hulanda Karibense tin trabou pagá
E partisipashon laboral nèto di mayor ku yu bou di 12 aña bibá na kas tabata mas haltu ku promedio bou di e poblashon entre 15 pa 75 aña na Hulanda Karibense (91 porshento kontra 72 porshento). Na Saba, di e mayornan ku yu chikitu, 94 porshento tabatin trabou pagá, kontra 91 porshento na Boneiru i 90 porshento na Sint Eustatius. Mayornan soltero tabatin trabou un tiki ménos frekuentemente kompará ku mayor ku ta biba huntu ku un partner. Ademas, ku 96 porshento, tabatin mas tantu tata ku trabou pagá ku mama (86 porshento). Di e mayornan ku trabou ku yu bou di 12 aña bibá na kas na Hulanda Karibense, 87 porshento na 2022 tabata traha fultaim. Na Sint Eustatius ku 39,9 ora pa siman, e durashon di trabou
promedio tabata mas haltu ku na Boneiru (38,0 ora) i na Saba (37,2 ora).

Prinsipalmente na Sint Eustatius repartishon igual di kuido pa mucha
Tambe a puntra pareha di mayor ku yu bou di 12 aña bibá na kas na Hulanda Karibense kon nan ta repartí e kuido pa nan yunan. Mitar di e mayornan a indiká ku nan tur dos ta hasi mas o ménos mes tantu. 33 porshento tabata hasi e kuido huntu, pero e mama tabata hasi mas. 10 porshento tabata hasi e kuido huntu, pero netamente e tata tabata hasi mas. Ademas, 4 porshento a bisa ku solamente e mama tabata kuida e yunan i 1 porshento ku ta e tata so. Na Sint Eustatius, e porsentahe di mayor unda tur dos tabata tuma mas o ménos mes tantu enkargo di kuido riba nan mes, ku 76 porshento tabata mas haltu ku promedio na Hulanda Karibense. Na Saba, ku 29 porshento esei tabata netamente mas abou.

Splikashon
Partisipashon laboral nèto E parti di e poblashon profeshonal ku trabou den e poblashon (poblashon profeshonal i no profeshonal). E definishon aki ta konta pa personanan ku ta biba na Hulanda Karibense (eksepto e poblashon den instituto). Mas tantu, sa presentá e datonan pa e poblashon entre 15 pa 75 aña.
Fultaim
E grupo aki ta konsistí di tur persona entre 15 pa 75 aña ku ta biba na Hulanda Karibense i ku ta
hasi trabou pagá pa 35 ora òf mas pa siman.

error

Enjoy this blog? Please spread the word :)

WordPress Cookie Plugin by Real Cookie Banner