Willemstad- Resientemente, Stichting Overheids Accountant Bureau (SOAB) a entregá nan
relato anual 2022 na minister di Finansa, sr. Javier Silvania. Ku entrega di e relato anual, ku e
tema “Transformashon”, SOAB ta konfirmá nan deber di kumplimentu responsabel den kuadro
di bon gobernashon i maneho korporativo adekuá.
SOAB, e akountent di gobièrnu enkargá ku kòntròl i konseho pa gobièrnu i institutonan
gubernamental, ta komprondé e importansia di responsabilisá na e mandatarionan eligí. E
relato anual 2022, banda di ta kontené informashon finansiero, tambe ta duna un resúmen di
algun tarea importante ku durante e último aña a keda ehekutá. Ademas SOAB ta duna kuenta i
rason tokante ehekushon di e maneho di personal i garantia riba nan kalidat organisatorio.
Ku e tema di e relato anual 2022 “Transformashon”, SOAB ta asertá e prosesonan di kambio ku
ta tumando lugá den nan organisashon. E kambio mas sobresaliente tabata e mudansa físiko pa
un edifisio nobo i modèrno na Kòrsou ku ta kumpli ku eksigensianan di e empleadó i doño di
trabou modèrno, sostené pa inovashonnan ku ta fasilitá trabou. E forma di traha hibrido a sigui
haña e struktura adekuá durante 2022 ku a keda fortifiká den e maneho di SOAB.
Mes momentu e direkshon stratègiko nobo na SOAB, unda e mentalidat pa kresementu
kontinuo i desaroyo (‘continuous growth & development’) di kada profeshonal a prevalesé i a
sigurá ku e
proseso di transformashon a kontinuá durante e aña 2022, eksitosamente.
Transformashon ta referí na prosesonan di kambio profundo i duradero, partikularmente
kambionan sostenibel dirigí riba e transformashon fundamental i struktural di
pensamentu i komportashon di tantu gruponan, komo individuonan.
Ku entrega di e relato anual na minister Silvania pa medio di e direktornan di SOAB, Raymond
Faneyte i Renata Sandriman, kompañá pa Annemarie v/den Horst, presidente temporal di
Hunta di Supervishon, SOAB ta enfatisá transparensia, bon gobernashon i desaroyonan
kontinuo pa kambio i mehoransa di su servisionan na bienestar di maneho finansiero di
gobièrnunan di Kòrsou i Sint Maarten i tambe tur otro kliente.
Ta SOAB su empeño pa mediante stándart di kalidat, norma i balor ku ta traha kuné, sigui traha
riba inovashon, mehoransa i kambio den e organisashon pa mantené i optimalisá konfiansa di e
siudadano relashoná ku transparensia i maneho responsabel di fondonan públiko.
Pa preguntanan aklaratorio òf pa mas informashon, por tuma kontakto via +599 9 466 9000 òf
koreo elektróniko marcom@soab.cw.

error

Enjoy this blog? Please spread the word :)

WordPress Cookie Plugin by Real Cookie Banner