Segun Parlamentario pa partido MFK, señor Gilbert Doran: mester toka ritmonan típiko di nos isla na Airopuerto Internashonal di Kòrsou!
Ta mas ku lógiko i usual ku na momentu ku bo pia pisa suela di kualkier pais, lo bo kier tende,
mira i sinti e historia kultural di e pais kaminda bo ta bishitá. I esaki netamente ta kuminsá na su
airopuerto. Ta lamentabel ku un isla asina bibu na historia i kultura, i ku asina tantu potensial herensia
históriko pa bende, no ta konsiente ku músika por ehèmpel, ta unu di e promé i prinsipal
maneranan pa traspasá no solamente historia, sino tambe kuriosidat pa tende i sa mas di e isla en
kuestion.
Den aktualidat, na momentu ku bo yega Airopuerto Internashonal di Kòrsou, ta ritmonan
estranhero ta lokual ta toka. Kòrsou ta konosí komo un isla ku ta apoyá i tambe disfrutá di tur
ritmonan internashonal. Pues nada kontra di ningun otro ritmo ku ta gustá i tambe skuchá aki na
nos isla. Pero e realidat ta ku ritmonan internashonal ta esnan mas zoná na nos airopuerto, siendo
ku nos tin un kantidat inkontabel di piesa i komposishonnan krioyo eksklusivo pa bende i pa
marka nos komo un pais riku na músika i historia, i simplemente no ta hasiendo esaki.
Un bon tumba, un wals, mazurka, kaha di òrgel, seú, tambú i asta e beibi den nan, ritmo kombiná,
ta algun ehèmpel klave di un diversidat di ritmo ku ta identifiká e kurasoleño debidamente, i kual
ningun hende por desmentí tampoko ku ta hopi gustá bou di e grupo turístiko. Pues no tin un
rason bálido pa sostené e postura eróneo di no toka nos ritmonan kultural na nos airopuerto
internashonal!
Pa hopi aña nos ta manifestando di ta deseá un pais mas sólido den patriotismo. Un pais mas uní
den kultura. I un pais mas tribí pa defendé su historia. Pero si nos mes no ta mira e balor ku nos
ta agregá na nos kultura dor di pone lokual ta di nos na promé lugá, niun hende na mundu lo por
hasi esaki pa nos. Manera Ike Jeserun a kanta; e baranka aki ban defendé! Ban defend’é ku alma i kurpa. Ban para mas fuerte pa loke ta di nos! I ban biba nos kultura i toka nos ritmonan na tur momentu. Ta nan
ta di nos. I ta nan nos mester salbaguardiá. Sino aki poko tempu nos lo no ni kòrda mas kua ta
nos ritmonan, paso nos a pone esnan di otronan na prioridat promé ku di nos!
