Caribbean Research and Management of Biodiversity (CARMABI) resientemente a enfatisá algun
kambio grandi i logronan impreshonante pa Kòrsou durante e último reunion di Direktiva di Dutch
Caribbean Nature Alliance (DCNA) . Logronan ta enserá e anunsio di un parke marino nobo na Ost
Punt i tambe apertura pronto di dos otro parke natural nobo. Ademas a enfatisá e rekuperashon di
vegetashon i di biodiversidat na Parke Christoffel. 2022 ta primintí di bira un aña eksitante pa
konservashon riba e isla.
Parke Nashonal Christoffel
Parke Nashonal Christoffel, e área protehá mas grandi i mas bieu di Kòrsou i e área ku mas biodiversidat
denter di e islanan ABC, ta un kaso di estudio inspirante di restorashon di habitat pa nos region. E parke
ta formá rondó di tres anterior plantashi i áreanan ku tabata usa pa agrikultura, kapmentu di palu i pa
kabritu i otro hèrbivornan introdusí bai kome na mondi. Dor di e importansia redusí di plantashinan for
di añanan 1960 i di mudamentu di kabritunan na añanan 1990, por a opservá i a dokumentá entre 1985
ku 2019 kambio den e vegetashon. E maneho eksitoso akí di e parke a bini na klaridat ku e oumento
grandi den kobertura i abundansia di diferente mata nativo inkluso palunan, bromelianan (tekunan),
orkidianan, palmanan. E rekuperashon di vegetashon di Parke Nashonal Christoffel probablemente ta
hasiendo influensia direktamente riba e abundansia di animalnan nativo, inkluso e biná di Kòrsou, biná
ku rabu blanku, ku lo bira tópiko di estudio intensivo den e próksimo añanan.
Parkenan nobo
Otro notisia nobo i eksitante, e apertura di e parke nobo Curacao Rif Mangrove Park ta djis tras di porta.
E parke akí ta inkluí bunita ruta riba kaminda di palu na altura i un toren di para mira ku mester kaba
konstruí, kreando akseso nunka bista pa e palunan di mangel. Tin plannan pa un futuro sentro di
bishitante ku realmente lo yuda bishitantenan i tambe habitantenan lokal apresiá e maravianan di e isla
su mondinan di palu di mangel (mangrove).
Un otro parke nobo na kaminda ta e parke nashonal Rif Sta. Marie- Hermanus, situá den un área
akuátiko di Ramsar di importansia internashonal ku ta inkluí un fòrnu di kalki históriko.
Parke Marino Curaçao
Logronan resien ta ekstendé bou di awa tambe, ku apertura na novèmber 2020 di Parke Marino
Curaçao, inougurá ofisialmente pa Patrona di DCNA Su Altesa Real Prinsesa Beatrix. Seguidamente na 7
di mart 2022, Parke Marino Curaçao a anunsiá ku nan a kore nan promé patruya ku nan boto nobo,
Yaru, ku lo sirbi pa promové uso seif i duradero denter di e parke pa hopi aña mas pa bini.
Den e Parke Nashonal Marino, lo establesé e stashon supmarino di investigashon Proteus Underwater
Research Station. Esaki lo hasi posibel ku sientífikonan por biba i hasi investigashon direktamente for di
fòndu di oséano. PROTEUS™ ta un proyekto di Fabien Cousteau Ocean Learning Center (FCOLC) i ta un
vishon di Fabien Cousteau.
Investigashon
Tin tambe algun estudio di investigashon importante ku a hasi rònt di e isla. Tendensia serka koralnan,
apesar ku generalmente tin un bahada, a tuma nota di algun restorashon rápido na sitionan lokal for di 2014. Esaki ta un lus di speransa pa restorashon i konservashon di koral riba e isla. Modèlnan mehorá di e liña di kosta i di awa den tera lo sigui drecha e informashon disponibel na managernan di área di
tera pa futuro proyektonan.
Carmabi a remarká ku ainda tin algun área ku tin mester di investigashon. Na 2022, nan lo kontinuá ku
investigá áreanan di mondi den Parke Nashonal Christoffel. Carmabi ta enfatisá e nesesidat pa enfoká
riba matanan nativo i konstantemente ta oumentá intentonan di kria mata nativo den kriadero na kas pa
hasi investigashon di e espesienan akí i pa siña públiko general e importansia di mata nativo. Ademas,
komo ku wetlands ta sigui haña rekonosementu pa nan importansia, tantu den servisio di
medioambiente komo den formashon di resiliensia kontra kambio di kima, Carmabi ta enfatisá e
importansia di investigashon mas aleu den áreanan di mondi di palu di mangel lokal.
Trahando huntu
E reunion di direktiva di DCNA ta un oportunidat importante pa kada un di e Organisashonnan di
Maneho di Área Protehá na Karibe Hulandes – Fundacion di Parke Nacional Aruba Foundation (FPNA),
STINAPA Bonaire , Carmabi Curaçao , Saba Conservation Foundation (SCF) , Nature Foundation St.
Maarten (NFSXM), St. Eustatius National Parks (STENAPA) – pa kolaborá, kompartí rekursonan i
interkambiá informashon i ideanan. Trahando huntu, kada isla por siña di e otronan, maksimalisá nan
éksitonan i siña di mas eksperensianan ku reto.
