E konferensia aki tabatin komo título “Make it strong- Empower the Caribbean Youth”. Union Europeo a dekretá aña 2022 komo aña pa hóbennan. E konferensia a wòrdu organisá den kolaborashon ku Kámara di Komèrsio i Universidat di Kòrsou (UoC) pa huntu ku hóbennan den Karibe dialogá riba importansia di
Europa pa Kòrsou i kiko siudadano Europeo ta nifiká pa nan. Resientemente Europe Direct Curaçao su
plataforma pa hóbennan a wòrdu lansá ku e meta pa duna kontenido na e aña pa hóbennan di Union
Europeo ku yudansa di hóbennan na Kòrsou mes.
E promé dia di konferensia a tuma lugá riba tereno di Universidat di Kòrsou i a wòrdu dirigí pa Roberto
Willems, konsehero di e ret nashonal pa siudadanía global i internashonalisashon na Hulanda, alabes
embahador di eTwinning. Señor Willems a profundisá riba retonan ku nos ta eksperensiando
mundialmente a konsekuensia di COVID i kon Union Europeo ke atendé ku e retonan aki huntu ku e
próksimo generashon. Sr. Willems a pone énfasis riba e echo ku nos hóbennan ta multilingual i ku esaki
ta di gran balor i tin un bentaha enorme den Europa. Studiantenan ku ta forma parti di konseho di
alumno na MIL, Radulphus College i UoC a reakshoná ku entusiasmo i a kompartí nan vishon pa futuro i
e prioridatnan ku nan ta mira pa Kòrsou. Inovashon, digitalisashon i edukashon ta e aspektonan ku
mester tin mas prioridat, segun e hóbennan ku tabata presente.
Di dos presentashon tabata na enkargo di Judric Pietersz, ordenadó teritorial suplente pa ‘Europees
Ontwikkelingsfonds’ (EOF). Señora Pietersz a pone atenshon riba proyektonan eksitoso di Union
Europeo ku a tuma lugá na Kòrsou i proyektonan ku den futuro lo wòrdu finansiá pa Union Europeo.
Despues di un lektura tokante siudadanía di Union Europeo, dirigí pa prof. dr. Flora Goudappel, dekano
di e fakultat di lei na UoC i alabes eksperto riba tereno di Union Europeo, e hóbennan a haña un
rekorido den e fakultat tékniko di UoC. Nan a sera konosí ku estudionan tékniko pasobra nan ta e yabi
pa trabou digital i bèrdè den futuro. Dianan 5 i 6 di aprel Europe Direct Curaçao a sòru pa seshon di informashon na Ancilla Domini i Radulphus College bou di guia di sr. Willems, kompañá pa algun miembro di Europe Direct Curaçao Youth Sounding Board ( plataforma di hóbennan ) pa asina involukrá hóbennan den un debate tokante Europa.
E tópikonan di Union Europeo aki tambe a bini dilanti durante di un wèbinar dia 5 di aprel kaminda dos
hóben representante di Union Europeo na Hulanda, Leah Corsmit i Leverne Nijman, a informá e
partisipantenan tokante influensia di Europa riba nos bida diario i kon e diferente instansianan di Union
Europeo ta funshoná. Eduard Slootweg, kabesante di e departamento di tradukshon di parlamento
europeo na Hulanda, establesé na Luxemburg a papia di e posibilidatnan ku hóbennan tin pa yega na un
lugá pa kore stazje den un instansia di Union Europeo. Arxen Alders, ex-stazjèr di e Liaisonbureau di
Parlamento Europeo na Den Haag tambe a kompartí su eksperensianan ku e partisipantenan.
Europe Direct Curaçao, un inisiativa di Kámara di Komersio i Industria di Kòrsou i Stichting Caribische
Belasting en Europawinkel (CBE) a wòrdu lansa na mei e aña aki. Establesimentu di EUROPE DIRECT
CURAÇAO ta wòrdu finansieramente apoyá dor di Komishon Europeo, e direktiva di Union Europeo.
Esun ku ta buska informashon tokante di Union Europe, hopi biaha no sa unda e kuminsá. E struktura aki
ta eksistí basta tempu kaba i ta aktivo den henter EU ku mas ku 500punto di informashon, pero
anteriormente nunka promé tabata tin un presensia den region di Karibe.
